د. محمد أبو علي .. يكتب: وديع الصافي .. بين «ودع هريرة» للأعشي وزوجتي مسافرة وحنعمل حفلة !
طول عمري بسمع الأغنية دي فقط ، أول مرة أشوفها فيديو ، ولم أصدق ابتسامة الفرح والسعادة علي وجه وديع الصافي، و قد اكتشف أن من يحبها أو من يزعم أنه مغرم بها حد تاني سبقه وخد قلبها.
أرجو أن تتأمل وجه وديع الضاحك المنفجر فرحا وهو بيقول حد تاني سبقني وخد يدها.
بالله عليك يا وديع يا صريع الهوي:
إيه اللي بيخليك تضحك اوي من قلبك لما عرفت إن حد تاني سبقك ونجاك منها ؟
ومن مهمة الارتباط بها ؟
الفرحة بتتنطط علي وجهك فبلاش موضوع النظرة اللي خلاتك صريع الهوا عشان انت بتكدب يا يا وديع وما انتش صريع ولا حاجة.
ولغة الجسد عندك تبعث برسائل تختلف تمام عما تقوله بلسانك.
شوف بيقول إيه:
على رمش عيونها قابلت هوى
طـــار عقلي مني وقلبي هوى
ماشي ولو أن مش مصدق من أول مرة تقع علي بوزك وأنت طبيب الهوي.
طبيب إيه يا عم وديع ؟
وانا يللي كــــنت طبيب الهوى
ولأهل العشق ببيع الدوا
من نظرة لقيتني صريع الهوى
ياباي يا بوي
بعيدا عن يا باي ويا بوي خلينا في كلمة من نظرة لقيتني صريع الهوي.
طبعا العشق من نظرة ومن أول نظرة جاء كثيرا جدا في كلام العرب منها البيت الجميل جدا الذي ما زال في عقلي وقلبي وخاطري:
وإني علي إشفاق عيني من العدا
لتجمح مني نظرة ثم أطرق
شايفين جموح النظرة للمحب العاشق المتهيب من أهلها والخائف جدا أن يفتضح أمر حبهما بسبب تبادل النظرات فيقرر بينه وبين نفسه حبا لها وصونا وخوفا ألا ينظر إليها إلا أن قلبه غير المتعقل يأمره بأن تجمح منه نظرة قصيرة خاطفة يـُهدئ بها كل جوارحه فتجمح النظرة جموح الحصان الذي انفلت عقاله وأصبح غير مسيطر عليه كما لم يستطع هو أن يسيطر علي قلبه.
الله علي كلمة نظرة وتوظيفها هنا.
ثم تأتي فتاة أخري ماكرة في موقف شبيه لتعلم حبيبها كيف يكون النظر إليها دون أن يفتضح أمرهما فتقول له:
إذا جئت فامنح طرف عينك غيرنا
لكي يحسبوا أن الهوي حيث تنظر
.. بص لغيري وانا حكون عارفة انك بتبص عليَّ.
ويؤكد شاعر آخر قاعدة العشق الأولي التي سيكررها شوقي، فيقول :
الحب أول ما يكون بنظرة
كذا الحريق بداؤه بشراره
يا من أحب ولا أسمي باسمها
إياك أعني فاسمعي يا جارة
تمر السنون ليأتي أمير الشعراء أحمد شوقي، واضعا قواعد العشق وخطواته في بيت واحد يقول فيه:
نظرة
فابتسام
فسلام فكلام
فموعد فلقاء.
شفت قاعدة العشق الأولي النظرة فالنظرة سهم أطلق من كيوبيد الأعمي لن نعرف من سيصيب ؟
ثم نختتم توظيف كلمة نظرة وأثرها السحري بالفنانة سيمون التي كررت قول شوقي فقالت:
مش نظرة وابتسامة .
مش كلمة والسلامة.
دي حاجات كتيرة ياما لو ناوي تحبني.
هل وصل وديع وكاتب كلماته إلي أي مستوي في توظيف كلمة نظرة ؟
يُكمل في عد مفاتنها ومحاسنها فيقول:
لها ضحكة يا ويلي بلون السهر
خايف نقول مش حاسس بوجه الشبه، وكيف يكون لون السهر، وأرجو ممن يحب التحليل والتعليق أن يتوقف هنا تحديدا.
عامة لن أتوقف طويلا عند الصور المتلاحقة التي جعلتنا نكرر مع شجن صوت وديع دون أن نضع أيدينا علي شيء وكأنه نسج لحبيبته ثوبا من أشعة القمر.
لما الورد بيملا شـفايفُه قمر
ضحكة لها بالود ابتسامة القدر
فوق خدود العطاش في يوم المطر
.. المصيبة العاطفية تبدأ من هنا:
خدني شوقي لقيتني بروح عندها.
وأنا قاعد أراجع الجملة بفتكر عادل إمام وهو بيقول «متعودة…… دائما».
الراجل أول ما حس بالشوق على طول راح عندها وكانت المفاجأة .
إيه اللي حصل ؟
حد تاني سبقني وخد يدها .
طيب مفيش اي كلمة تقولها يا وديع تبين رفضها وحرصها عليك ؟
مصيبة إنه كان استبن .. استبن عاطفي ، بديل لحبيبها .
الغريب إن مصور الكليب أخفق بشدة لما خلى وديع فرح جدا جدا جدا لأن حد تاني سبقه وخلصها منه .
شعرنا من ضحك وجه وديع المبالغ فيه بأنها كانت مفروضة عليه وعشان كده فرح جدا برجوع حبيبها .
كان حبيبها وغايب بقالو سنة
والنهارده وصل على بختي أنا
وأنا يللي كنت طبيب الهوى
ولأهل العشق ببيع الدوا.
فرحة وديع هنا بخلاصه من هذه الفتاه تشبه فرحة بطل أغنية زوجتي مسافرة وحعمل حفلة.
لِمآَ يفرح الرجال حين تترك الزوجات البيت ولو ليوم واحد ؟
انفتح الحصار
ياكل في المطبخ
يشرب في اجمل طقم من النيش.
ينام علي الكنبة في الانتريه.
يقوم يعمل قهوة ويخبط الفنجان برجله غصب عنه فيقع علي السجادة .
هل الحاجات التافهة دي اللي بتخلي الرجالة فرحانة لما الزوجة تروح تزور أمها ؟
طبعا ما حدش حيعلق من الرجالة «الرجالة» عشان الكل بيبقي زعلان جدا جدا جدا علي فراق زهرة البستان لبيتها لمدة ساعات وكأن كل روائح العطر ستختفي بذهابها.
كلنا طبعا بنزعل عشان الزوجة حتسيب البيت .
طيب إيه اللي مخلي وديع فرحااااااان أوي كده أن حد تاني سبقه وخلصه منها ؟
نفس إحساس الأعشي وهو يردد ساخرا فرحا:
ودع هريرة إن الركب مرتحل
وهل تطيق وداعا أيها الرجل ؟
.. كل واحد يرد عن الأعشي:
وهل تطيق وداعا أيها الرجل .
أزعم مع الناقد الكبير محمد النويهي أن الأعشي سعيد جدا جدا جدا برحيل هريرة البدينة السمينة الطويلة العريضة عن البيت.
راجع معايا كده وصف هريرة وانت حتفرح مع الأعشي إنها سايبة البيت وحتغور في داهية وأخيرا حيكون لوحده .
غراء فرعاء مصقول عوارضها تمشي الهوينى كما يمشي الوجي الوحلُ.
واخدين بالكم من حروف المد في غراء وفرعاء وكأنه يحاول إثبات طول الزوجة المبالغ فيه .
لا يشك أحد في أن الطول في المرأة أمر ممدوح عند الرجال لكن الطول بقدر وليس الطول المبالغ فيه كطول هريرة الطويلة جدا وليست طويلة فقط ولكن مصقولة العوارض وليس هذا فقط ولكن من طولها تتأرجح في مشيتها كالإنسان الحافي الذي يسير في وحل ويخاف من التزحلق.
مشية مضحكة وغير منضبطة تجعلنا نضحك جميعا ساخرين مع الأعشي منها وفرحين برحيلها مرددين مع أغنية اليومين دول زوجتي مسافرة.
نفس فكرة زوجتي مسافرة .
ممكن أي حد في حضراتكم يتوقع ليه وديع سعيد جدا جدا جدا وفرحان إن حد تاني سبقه وخد يدها.
بصراحة، بعيدا عن كل اللي فات، مخرج الكليب حط قدامنا سببا واحدا فقط وهو بلغة هاني رمزي في محامي خلع كيف يختلط الزيت بالماء ؟
وديع عرف إمكانياته وأنه مستحيل مستحيل مستحيل أن يعشق عجوز في سنه حسناء صغيرة شابة تحتاج إلي قريب منها في السن.
هيهات أن يختلط الزيت بالماء .
وديع عرف بلغة هاني رمزي إنه ربع حصان وإنها ٦٤ حصان.
عشان كده كان فرحان أن حبيبها رجع لها وخلصه من هذا الورطة التي لا يستطيعها.
طولت عليكم
.
